പിശുക്കരിലും പിശുക്കനായ കാമുകാ ..
കുറച്ചധികം വിസ്തരിച്ചൊരു മെസ്സേജ് അയച്ചാൽ
ഇന്ത്യയിലോ വിദേശത്തോ നിനക്ക് കരം കൊടുക്കേണ്ടി വരുമോ …
ഒരു മുതല്മുടക്കുമില്ലാത്ത സ്മൈലി
അതിപ്പോ
ഉമ്മയായാലും
ചോന്ന ഹൃദയമായാലും
ഒന്നോ രണ്ടോ .
അല്ലാതെ
അതില്കൂടുതൽ അയച്ചാൽ
നിന്റെ ബാങ്ക് ബാലൻസ് കുറഞ്ഞു പോകുവോ ??
ഇത്രമാത്രം ദാരിദ്ര്യമുള്ള മെസ്സേജ് അയക്കുന്ന
കാമുകൻ നീ മാത്രേ
ഈ ഭൂമി മലയാളത്തിൽ കാണു ..
നീണ്ടു പരന്നൊരു കവിതയും എഴുത്തുമൊക്കെ അയക്കുമ്പോ
ഒരു ഹാർട്ടോ
അല്ലെങ്കിൽ രണ്ടുമ്മയോ
മാത്രം മറുപടി തരുന്ന
നിന്റെ ലുബ്ദം കാണുമ്പോ
ഒരെണ്ണമെങ്ങാനും
അറിയാതെ കൂടുതൽ അയച്ചാൽ
ചാട്ടവാറടിയെങ്ങാനും
ശെരിയത് കോടതി വിധിക്കുമോ ?
നീയെഴുതിയ
അതി ഗംഭീര പ്രണയപ്പാട്ടുകളും
കവിതയുമൊക്കെ
മുൻകാല പ്രാബല്യത്തോടെ ഗാലറിയിൽ ഇപ്പോഴുമുള്ളതിനാലും
പുസ്തകങ്ങൾ വായിച്ചും വാങ്ങിച്ചും
കൂട്ടുന്നതിനാലും
പത്തും നൂറും പേജിൽ കഥകളും നാടകവും
ലേഖനങ്ങളും
എഴുതുന്നതിനാലും നിനക്ക് ഇനി അക്ഷരാഭ്യാസമില്ലേ
എന്ന് സംശയിക്കാൻ തരമില്ല.
അല്ലയോ മഹാനുഭാവ ,
ഇനീ നിമിഷം വരെം
ഒരു പ്രേമലേഖനം പോലും കിട്ടാതെ
വരണ്ടുപോയ ഒരു കാമുകിയുടെ
ഹൃദയവേദന നിങ്ങൾ ഇനിയെപ്പോഴാണ് മനസിലാക്കുക ?
കണ്ണാടിയൊക്കെ വെച്ച്
ബുദ്ധിമുട്ടി തപ്പിത്തടഞ്ഞു
പ്രണയലേഖനം വായിക്കുന്നത്
എന്ത് ബോറാവും എന്ന്
താങ്കൾ ഒന്ന് സങ്കല്പിച്ചു നോക്കണം ,,
അതത്ര ബുദ്ധിമുട്ടുള്ള പണിയാണെന്നു തോന്നുന്നില്ല .
അതുകൊണ്ട് സങ്കല്പിച്ചു നോക്കണം .
അതുംപോരാഞ്ഞു
ഇനി കുറേ കൂടി താമസിച്ചാണ്
താങ്കൾക് ബോധോദയം ഉണ്ടാകുന്നതെങ്കിൽ
ഞാനെന്റെ മക്കളെയോ
കൊച്ചുമക്കളെയോ
കൊണ്ട് അത് വായിച്ചു കേൾക്കേണ്ടി വരും അതതിലും എന്തൊരു ബോറാണ് !!
അതിനപ്പോൾ ഞാൻ തനിയെ വായിക്കുമ്പോൾ അനുഭവിച്ചേക്കുമായിരുന്ന
ആ ചിത്രശലഭ തുടിപ്പുകളും
ഇതുവരെയുഅറിഞ്ഞിട്ടില്ലാത്ത
പ്രേമലേഖന സുഖവുമൊക്കെ നഷ്ടമാകും .
ഇനിയിപ്പോ ഞാനങ്ങു മരിച്ചു പോയ ശേഷമാണ്
താങ്കൾക് അങ്ങനൊരു സാഹസം ചെയ്യാൻ തോന്നുന്നതെങ്കിൽ
എനിക്കതിൽ ഒരു അവകാശവും പിന്നില്ലെല്ലോ .
ഇതൊക്കെ ഈ അക്ഷര പിശുക്കനായ എന്റെ
പ്രണയിതാവിനോട് പറഞ്ഞിട്ട് വല്ല കാര്യവും ഉണ്ടോ എന്ന് ചോദിച്ചാൽ
നിസ്സംശയം പറയാം
ഒരുപിണ്ണാക്കും നടക്കാൻ പോകുന്നില്ല
ഞാനിങ്ങനെ എന്തൊക്കെ
എത്രെയോ തവണ പറഞ്ഞിരിക്കുന്നു !
എങ്കിലും എന്റെ അക്ഷര പിശുക്കാ
പ്രേമലേഖനം ഈസ് പ്രേമലേഖനം
ഒരെണ്ണമെങ്കിലും നിന്റെ കൈയ്യക്ഷരത്തിൽ കിട്ടാതെ ഞാനങ്ങു ചത്തുപോയാൽ
അതെന്നാ നാണം കേട്ടപോക്കായിരിക്കുമെന്നു
നീയൊന്നോർത്തു നോക്കിയേ ..
അതും മരണം വരേം
“നീയേ “എന്ന് മാത്രം ഓർത്തു നടന്നിട്ട് !
ബുർജ് ഖലീഫയോ
ഈഫൽ ടവറോ
പിങ്ക് ഡയമണ്ടോ ഒന്നുമല്ല ഹെ
ഞാൻ ചോദിക്കുന്നത് …
ഒരു പ്രേമലേഖനം
അതും ഒരേ ഒരു പ്രേമലേഖനം .
ഒരു വെള്ളക്കടലാസുപോലും
വാങ്ങി ബുദ്ധിമുട്ടേണ്ട ..
കയ്യിലുള്ള തൊട്ടു ഞെക്കി യന്ത്രത്തിൽ
തൊട്ടു തേച്ചതായാലും മതി .
ഒരെണ്ണം ഒന്ന് കൊടുക്കെന്റപ്പാ
നീയെഴുതേണ്ട പ്രേമലേഖനം
നിന്നോടല്ലാതെ വേറെ ആരോട് പോയി ചോദിക്കും
എന്നെനിക്കറിയില്ലാത്തതിനാൽ
നിന്നോട് തന്നെ വീണ്ടും വീണ്ടും ചോദിക്കുന്നു .
ആരോട് പറയാൻ
ആര് കേൾക്കാൻ