ഹൃദയമെന്നു പേരിടാനാവാത്ത പുസ്തകം

നേർത്ത തേങ്ങലുകളുള്ള
ഇലകൾ വരച്ചുകൊണ്ടു കരയാനൊരുമ്പെടുന്ന ഒരു വൃത്തം.
ഹൃദയമെന്നു പേരിട്ട
ആ പുസ്തകം തിരിച്ചും മറിച്ചും നോക്കിയിട്ടവൾ തിരികെവെച്ചു.

അലക്കാനുള്ള തുണികൾക്കിടയിലാണു
പെണ്ണിന്റെ ഹൃദയമെന്നവൾ വിശ്വസിച്ചിരുന്നത്.

പിഴിഞ്ഞു കുടഞ്ഞു വിരിക്കുമ്പോൾ
സ്നേഹം മാത്രം തെറിച്ചു പോകുന്നതുകണ്ടവളാശ്വസിക്കും.
അടുത്തിരിക്കലാണ് സ്നേഹമെന്നെവളെവിടെയോ വായിച്ചിട്ടുണ്ട്.
അത്
അവരവരുടെ അടുത്തിരിക്കലെന്നു
മൊഴിമാറ്റിപറയാനാഗ്രഹിച്ചു.
അങ്ങനെ എല്ലാദിവസങ്ങൾക്കും ഉപാസനയെന്നവൾ പേരിട്ടു.

കടും നിറത്തിലുള്ള സാരികൾ വാങ്ങി
ദിവസ്സവുമതുകഴുകി സ്നേഹമൊഴുക്കിക്കളഞ്ഞു.
അടുക്കില്ലാത്ത ഞൊറിയിട്ടതുടുത്തുകൊണ്ടുവീടലങ്കരിച്ചു.
ഇന്നലെ മീൻവെട്ടിയപ്പോൾ കൈ മുറിഞ്ഞു.
പാവയ്ക്കാത്തോരൻ അടുപ്പിലിരുന്നുകരിഞ്ഞു.

ഒരുകൊല്ലംമുന്നേവാങ്ങി വളർത്തുന്ന ഓർക്കിഡ് പൂവിടുന്നില്ല.
ചില്ലുകുപ്പികളിൽ മീനുകളെയും
കൂട്ടിൽ നാലുജോഡി വർണ്ണപക്ഷികളേയുംവളർത്തുന്നുണ്ട്
അവറ്റകളേയും മറ്റാർക്കും ഇഷ്ടമല്ല.

കറികൾക്കു പ്പിടുന്നതിൽമിടുക്കിയാണ്
ഭംഗിയിൽ ഷർട്ടുതേച്ചു മടക്കാനറിയാം
എത്രപേർ കേറിചെന്നാലും അനായാസം വിരുന്നൊരുക്കും.

അവൾപറയുന്ന നിസാരവർത്തമാനങ്ങൾകേൾക്കാൻ
ആവീട്ടിലാരുംതയ്യാറല്ല.

ഉറക്കത്തിലവൾ പുഴകളെസ്വപ്നം കാണും
അപ്പോഴൊക്കെപഴയകൂട്ടുകാരെ തേടിയിറങ്ങും
ഉപാസനകളിലവരെ യുംചേർത്തുപിടിച്ചു മഴനനയാനും
പുഴക്കരയിൽവീടില്ലാത്ത ഒരുവനെപ്രണയിക്കാനും
ഉറക്കെ പാട്ടുപാടാനും ശീലിക്കും.

കണ്ണടച്ചുനോക്ക്
നിങ്ങൾക്കവളുടെപാട്ടു കേൾക്കാം
ആരുടെയൊക്കെയോ മുറുമുറുപ്പും.