ഇതൊരു വരണ്ട കാലമാണ്…..
പാകിയ വിത്തുകൾ
മുളക്കാൻ മടി കാണിക്കുന്നു.
ചീകിയൊതുക്കിയ മുടിയിഴകളിൽ
വെളുത്ത വര തിളങ്ങുന്നു.
തിരിഞ്ഞു നോക്കിയപ്പോൾ
സർവ്വ വസന്തത്തിന്റെ ശേഷിപ്പുകളുണ്ട്.
മുന്പിലോ കറുത്ത ശൂന്യതയും.
ഇനിയിറക്കമാണ്.
കരുതിവെച്ചതെല്ലാം
കൺമറക്കുന്നൊരു
നീണ്ട പാതയിറക്കം….
എവിടെയോ ഒന്ന് പിടയുന്നുണ്ട്.
തിരിച്ചു പിടിക്കാൻ നീട്ടിയ കൈത്തലം
വിറയാർന്നു തിരിച്ചു വരുന്നു…..
ഓരോ ചുളിവും
വേദനകൾ ഒലിച്ചിറങ്ങുന്ന
ഓരോ പുഴയാവുന്നു…
ഓർമകളും കരകവിയുന്നുണ്ട്….
ഇനിയൊന്നെന്റെ മിഴികൾ ഇണ ചേരട്ടെ…
എന്റെ കവിതകളെ ചിക്കിപ്പെറുക്കി
ഒരല്പനേരമെങ്കിലും
ഞാനൊന്ന് ഞാനായിരിക്കട്ടെ……