എന്റെ മൗനത്തെ വ്യാഖ്യാനിക്കാൻ വരരുത്..!

മൗനമായിരിക്കുക എന്നാൽ..,
ശാന്തമായിരിക്കുക എന്നാവണമെന്നില്ല..

ഒരുപക്ഷെ
ഹൃദയത്തിന്റെ നടുവിലൂടെ,
കലങ്ങി മറിഞ്ഞൊരു
പുഴ ഒഴുകുന്നുണ്ടാവും..

അല്ലെങ്കിൽ..,
അശാന്തിയുടെ ഒരു കടൽ ആർത്തിരമ്പുന്നുണ്ടാവും..

അതുമല്ലെങ്കിൽ..,
ഒരു പെരുമഴ ഇടിമിന്നനിനൊപ്പം
നൃത്തം ചെയ്യുന്നുണ്ടാവും..

മൗനമായ് ചിരിക്കുന്നുണ്ടെങ്കിൽ..,
സന്തോഷം കൊണ്ടാവണമെന്നില്ല..
ഒരുപക്ഷെ
നൊന്തിട്ടും നോവുന്നില്ലെന്ന്
പൊള്ള് പറയുന്നതാവാം..

അല്ലെങ്കിൽ…,
നഷ്ടങ്ങളോട് പുഞ്ചിരിച്ച്
യുദ്ധം ചെയ്യുന്നതാവാം..

അതുമല്ലെങ്കിൽ..,
അപമാനത്തെ മറച്ചുവെക്കാൻ
ഒരു ചിരി കടം വാങ്ങിയതാവാം..

മൗനമായിരുന്ന് കണ്ണ് തുടച്ചെങ്കിൽ,
അത് ഉടലിൽ തൊട്ട-
വേദന കൊണ്ടാവണമെന്നില്ല
ഒരുപക്ഷെ
ചില ഒറ്റവാക്കുകൾ കൊണ്ട്
ഹൃദയം പൊള്ളിയടർന്നതാവാം

അല്ലെങ്കിൽ..,
സ്വകാര്യ സന്തോഷങ്ങളിൽ
കണ്ണുകൾ ചിരിച്ചതാവാം..

അതുമല്ലെങ്കിൽ..,
ചില നിറമുള്ള ഓർമ്മകൾ
ശബ്ദങ്ങൾക്ക് പുതപ്പായതാവാം..

ഒരാളുടെ മൗനത്തെ
പൂർണ്ണമായും വ്യാഖ്യാനിക്കാൻ
മറ്റൊരാൾക്ക് അസാധ്യമെന്നിരിക്കെ,
നിങ്ങളെന്റെ മൗനത്തെ വ്യാഖ്യാനിക്കരുത്..
നിങ്ങളപ്പാടെ തോറ്റു പോയേക്കാം…